बंदी झुगारून 'मनुस्मृती'चं पुनर्प्रकाशन

Gajanan Zilu Sawant | Maharashtra Times | Updated: 09 Mar 2016, 01:18:00 PM

बंदी झुगारून 'मनुस्मृती' ग्रंथाची मराठी आवृत्ती बाजारात आणण्यात आली असल्याने मोठा वाद उभा राहण्याची शक्यता असून राष्ट्रवादीचे नेते, आमदार जितेंद्र आव्हाड यांनी या ग्रंथाची विक्री तत्काळ न थांबवल्यास बुक स्टॉल्सवर हल्ले केले जातील, अशी धमकीच दिली आहे.

मटा ऑनलाइन वृत्त । मुंबई

बंदी झुगारून 'मनुस्मृती' ग्रंथाची मराठी आवृत्ती बाजारात आणण्यात आली असल्याने मोठा वाद उभा राहण्याची शक्यता असून राष्ट्रवादीचे नेते, आमदार जितेंद्र आव्हाड यांनी या ग्रंथाची विक्री तत्काळ न थांबवल्यास बुक स्टॉल्सवर हल्ले केले जातील, अशी धमकीच दिली आहे.

'मनुस्मृतीची विक्री थांबवा नाहीतर हिंसक प्रत्युत्तराला तयार राहा... आम्ही या ग्रंथाची विक्री करणाऱ्या दुकानांची आणि स्टॉल्सची तोडफोड करू', असा इशारा देणारे ट्विट जितेंद्र आव्हाड यांनी केले आहे. डॉ. बाबासाहेब आंबेडकर यांनी ज्या मनुस्मृती ग्रंथाची जाहीर होळी केली होती त्या ग्रंथाचे नव्याने प्रकाशन करण्यात आले आहे. राज्य सरकारची बंदी झुगारून महाराष्ट्रभर पुस्तकांच्या दुकानांमध्ये राजरोसपणे या ग्रंथाची सध्या विक्री केली जात आहे.

राज्य सरकारने दहा वर्षांपूर्वी मनुस्मृती या ग्रंथावर बंदी घातली होती. त्यानुसार या ग्रंथाचे प्रकाशन व विक्री करण्यास मज्जाव करण्यात आला होता. मात्र, हा आदेश कागदावरच राहिला. त्याची काटेकोरपणे अंमलबजावणी केली गेली नाही. त्याचाच फायदा उठवत पुन्हा एकदा 'मनुस्मृती'ने डोकं वर काढलं आहे.

मूळ संस्कृत भाषेत असलेल्या या ग्रंथाचे मराठी भाषांतर करण्यात आले असून नव्या स्वरूपात हा ग्रंथ विक्रीसाठी बाजारात आणण्यात आला आहे. बंदी असतानाही हा ग्रंथ महाराष्ट्रातील 'बुक स्टॉल्स'मध्ये विक्रीस ठेवण्यात आला असल्याने आश्चर्य व्यक्त होत आहे. याबाबतच्या बातम्या प्रसिद्ध होताच आव्हाड यांनी ही विक्री उधळून लावण्याचा इशारा दिल्याने त्यावरून राजकारणही तापण्याची शक्यता आहे.



दरम्यान, मनुस्मृती हा ग्रंथ कोणत्या कालखंडात लिहिला गेला याचे कोणतेही पुरावे नसले तरी ब्रह्मदेवाचा पहिला पुत्र मनू याने हा ग्रंथ लिहिला अशी मान्यता हिंदू धर्मशास्त्राने दिलेली आहे. ब्रिटीश काळात विल्यम जोन्सने या ग्रंथाचे इंग्रजीत भाषांतर केले होते. दलित, पीडित, शोषित आणि महिलांना गुलाम बनवण्याचे समर्थन करणाऱ्या ग्रंथाविरोधात घटनाकार डॉ. बाबासाहेब आंबेडकर यांनी सर्वप्रथम आवाज उठवला होता. २५ डिसेंबर १९२७ रोजी या ग्रंथाची बाबासाहेबांनी जाहीर होळी केली होती. मात्र, आता हेच पुस्तक पुन्हा बाजारात शिरल्याने मोठा वाद उभा राहण्याची शक्यता आहे.

महाराष्ट्र टाइम्सवर घ्या बातम्यांचे लेटेस्ट अपडेट्स